وفاقی کابینہ کا اہم اجلاس آج اسلام آباد میں ہو رہا ہے۔ اجلاس کا 15 نکاتی ایجنڈا جاری کردیا گیا۔ وزیر اعظم عمران خان کی زیر صدارت وفاقی کابینہ کے اجلاس میں سیاسی، معاشی اور اقتصادی صورتحال کا جائزہ لیا جائے گا، جب کہ صحافیوں کے احتجاج اور پی ایم ڈی اے کے معاملے پر بات ہوگی۔ ایجنڈے کے مطابق کابینہ بھاری گاڑیوں پر اضافی ڈیوٹی ختم کرنے کی سمری پر غور کرے گی، پرانی گاڑیوں کی ڈیوٹی سے متعلق کابینہ میں سمری پیش کی جائے گی۔ کابینہ ارکان پارلیمنٹ کی تنخواہوں سے متعلق مجوزہ سمری پر غور کرے گی۔ جب کہ ریگولیٹری اتھارٹیز کے چیئرمین اور ارکان کی تنخواہوں کی رپورٹ کا جائزہ لیا جائے گا۔ وفاقی کابینہ نادرا کے 5 رکنی بورڈ کی نامزدگی کی منظوری دے گی، کابینہ قائد اعظم فاؤنڈیشن ایکٹ 2021 کے مسودے کی منظوری بھی دے گی۔ بیورو آف امیگریشن اینڈ اوورسیز ایمپلائمنٹ کے سیکیورٹی امور بھی ایجنڈے کا حصہ ہیں۔ ایف بی آر ڈیٹا بینک ہیک ہونے کے بعد آپریشنل ایمرجنسی لگانے کا طریقہ کار طے ہوگا۔ دوسری جانب پینل سرچارج کی چھوٹ کی سمری اور رویت ہلال سے متعلق قانون سازی پر کابینہ میں بحث ہوگی، کابینہ میں دیامر بھاشا ڈیولپمنٹ کمپنی کے بورڈ آف ڈائریکٹرز کی تشکیل نو پر بات ہوگی۔ کابینہ کمیٹی نجکاری کے 10 اگست کے فیصلوں میں ترمیم کے فیصلوں کی توثیق ہوگی، جب کہ کابینہ ای سی سی اور ادارہ جاتی اصلاحات کمیٹی کے فیصلوں کی توثیق بھی کرے گی۔