لاہور: پاکستان تحریک انصاف (پی ٹی آئی) کے رہنما جہانگیر ترین کو وفاقی تحقیقاتی ادارے (ایف آئی اے) نے 8 سوالات کے فوری جواب طلبی کا نوٹس بھجوا دیا۔ ایف آئی اے نے پی ٹی آئی رہنما جہانگیر ترین کو 13 اپریل کو جواب لے کر حاضر ہونے کی ہدایت کر دی۔ نوٹس میں کہا گیا ہے کہ جہانگیر خان ترین کمپنی سیکرٹری کے ذریعے بھی جواب جمع کروا سکتے ہیں۔ نوٹس میں کہا گیا ہے کہ ایف آئی اے اگست 2020 سے جہانگیر ترین سے سوالات کے جواب مانگ رہی ہے اور جہانگیر خان ترین نے جمعہ کو ایف آئی اے کے سوالات کے جوابات دینے کا وعدہ کیا۔ بھیجے گئے نوٹس میں کہا گیا ہے کہ جہانگیر ترین جے کے فارمز کی تمام مشینری کی اصل رسیدیں جمع کروائیں۔ جہانگیر ترین جے کے فارمز کی 35 ہزار ایکڑ کے رقبے کے ثبوت بھی جمع کروائیں۔ ایف آئی اے کی جانب سے کہا گیا ہے کہ جہانگیر ترین نجی بینک کی رپورٹ جمع کروائیں جبکہ مشینری اور 35 ہزار ایکڑ رقبے کی تخمینہ رپورٹ جمع کروائیں۔ اس کے علاوہ جہانگیر ترین برطانیہ میں خریدی گئی جائیدادوں کی منی ٹریل بھی دیں۔