شہباز شریف نے کہا ہے کہ آرمی چيف جنرل قمر جاوید باجوہ نے کہا کہ نوازشريف نے ہميشہ ان کی عزت کی۔ اسلام آباد میں پریس کانفرنس کرتےہوئے اپوزیشن لیڈرشہبازشریف نے بتایا کہ آرمی چيف جنرل قمر جاوید باجوہ نے کہا کہ نوازشريف نے ہميشہ ان کی عزت کی،ميں اپنی طرف سے کچھ نہيں کہہ رہا اور يہ لفظ آرمی چيف کے ہيں۔ شہباز شريف نے مزید بتایا کہ آرمی چيف نے بتایا کہ پاک فوج کے ليے جب بھی کوئی کام نوازشریف کو کہا وہ پورا کیاگیا۔ شہبازشریف نےکہا کہ ملکی تاریخ میں آج اہم دن ہے اوربرطانیہ کی ایسٹ ریکوری براڈ شیٹ کمپنی کے سربراہ نےغیرمشروط طور پر نواز شریف سے معافی مانگ لی ہے۔ انھوں نے بتایا کہ برملا کہا گیا ہے کہ یہ معافی اس لئے مانگ رہے ہیں کہ 20 سال سے نواز شریف اور ان کے خاندان کے خلاف باریک بینی سے لوٹ مار کرپشن کی تحقیقات کے نتیجے میں ایک دھیلے کی کرپشن نہیں ڈھونڈ سکے۔ شہبازشریف نے بتایا کہ براڈ شیٹ والے یہ کہنے پر مجبور ہوئے کہ سابق صدر پرویز مشرف کی حکومت کے دوران ان کی خدمات لی گئیں اورنیب نے انہیں غلط اطلاعات دیں اور ہوا میں باتیں کی گئیں۔ لیگی رہنما نے براڈ شیٹ کے سربراہ کو بڑا آدمی قرار دیا اور کہا کہ حقائق کو تسلیم کرنا اورغلطی کا اظہار کرنا بڑا پن ہوتا ہے۔غریب عوام کے کروڑوں روپے نفرت کی آگ میں جھونک دیئے گئے اورعمران خان نے بھی اس میں اضافہ کرکے قوم کا پیسہ ضائع کیا۔ اپوزیشن لیڈر نے یہ بھی کہا کہ نواز شریف کی بے توقیری میں کوئی کسر نہیں چھوڑی گئی تاہم آج براڈ شیٹ کا ڈراپ سین ہوگیا اور نواز شریف کی نیک نامی اور ایمانداری دنیا کے سامنے آگئی جب کہ پوری قوم کےسامنےعمران خان کا جھوٹ سامنے آگیا۔ انھوں نے کہا کہ ان رازوں سے جلد پردہ اٹھے گا کہ کس طرح درد دل سے نواز شریف نے ملک کی خدمت کی اور اس گند کو صاف کرتے کرتے کئی سال لگ جائیں گے،نواز شریف واپس آئے گا توملک ترقی کی راہ پر گامزن ہوگا۔ شہبازشریف نے کہا کہ ہماری ڈکشنری میں انتقام کا لفظ نہیں ہے،عمران خان  کی ایم این اے نے افواج پاکستان کے خلاف زہرافشانی کی ہے۔ انھوں نے یہ بھی کہا کہ عمران خان نے جو کچھ افواج پاکستان کے بارے میں کہا اور گھٹیا زبان استعمال کی وہ نہیں بیان کرسکتا۔