بلاتعطل فراہمی کیلئے30ملین کیوبک فٹ اضافی گیس سسٹم میں شامل
شائع شدہ تاریخ 14 دسمبر, 2019
لاہور سوئی ناردرن گیس کمپنی لاہور ریجن نے گھریلو صارفین کو بلا تعطل گیس فراہم کرنے کے لیے 30 ملین کیوبک فٹ اضافی گیس سسٹم میں شامل کرلی ہے۔موسم کی تبدیلی کیساتھ ہی شہر میں گیس کی طلب میں اضافہ ہوگیا ہے۔ سوئی ناردرن گیس کمپنی لاہور ریجن کی جانب سے اضافی گیس کے بعد شہر کو 280 ملین کیوبک فٹ گیس فراہم کی جا سکے گی۔ اعدادوشمار کے مطابق گزشتہ سال دسمبر میں لاہور ریجن کو دو سو پچاس ملین کیوبک فٹ گیس فراہم کی گئی تھی، تاہم رواں سال گیس کی طلب میں اضافہ ہوگیا ہے ۔ موسم سرما کی پیک پر تین سو چالیس ملین کیوبک فٹ تک طلب جانےکا امکان ہے۔چیف انجینئر راشد عنایت نے بتایا کہ گھریلو صارفین کو ہر صورت پریشر کیساتھ گیس فراہم جائیگی۔ صارفین کم پریشر پر کمپریسر لگانے کی بجائے کمپنی کو شکایت درج کرائیں۔ چیف انجینئرنے مزید کہا کہ کمپنی کی ٹیمیں بروقت صارفین کے مسئلے کا حل نکالیں گی ۔
