شہری اپنی اور خاندان کی حفاظت کے لئے گھر میں رہنے کو ترجیح دیں، وسیم اخترضلع وسطی میں 40 اسپرے گاڑیوں کے ساتھ جراثیم کش اسپرے کا آغاز کراچی: بلدیہ عظمیٰ نے جمعہ کو تیسرے روز ضلع وسطی میں 40 اسپرے گاڑیوں کے ساتھ جراثیم کش اسپرے کا آغاز کیا، یہ گاڑیاں میئر کراچی وسیم اختر کی ہدایت پر ہر ضلع کو شیڈول کے مطابق فراہم کی جارہی ہیں، گاڑیوں کے ساتھ ادویات اور تربیت یافتہ عملہ بھی بھیجا جارہا ہے ۔ میئر کراچی وسیم اختر نے کہا کہ شہر میں کورونا وائرس کی صورتحال کے پیش نظر دوسرے اقدامات کے ساتھ یہ بھی ضروری ہے کہ مختلف امراض سے بچاؤ کے لئے جراثیم کش اسپرے کیا جائے ۔ انہوں نے کہا کہ ملک و قوم کے لئے یہ انتہائی مشکل وقت ہے اور پوری دنیا کورونا وائرس کے باعث عدم تحفظ، تفکر اور خوف کا شکار ہے لیکن اس سے نکلنے کے لئے ہمیں ہمت، برداشت، حوصلے اور تدبر کی ضرورت ہے ، میں شہریوں سے پر زور اپیل کرتا ہوں کہ وہ اپنی اور اپنے خاندان کی حفاظت کے لئے گھر میں رہنے کو ترجیح دیں اور اگر گھر سے نکلنا بے انتہا ضروری ہو تو کورونا وائرس کے حوالے سے محکمہ صحت کی جانب سے جاری کردہ تمام احتیاطی تدابیر اپنائیں۔ میئر کراچی نے میونسپل پبلک ہیلتھ کے ایم سی کو ہدایت کی کہ کراچی کے رہ جانے والے تینوں اضلاع، ضلع کونسل کراچی اور اس کے مضافات میں بھی جراثیم کش اسپرے شیڈول کے مطابق کیا جائے اور یہ عمل ہفتہ اور اتوار کو بھی جاری رکھا جائے۔ انہوں نے کہا کہ کھلے مقامات، کچرا کنڈیوں، مساجد، مزارات اور بازاروں میں خاص طور پر جراثیم کش اسپرے کیا جائے۔