لاہور:اداکارہ متھیرا کا کہنا ہے کہ شادی بچانے کے لیے گھر اور شوہر کے وہ کام بھی کیے جو نہیں کرنے چاہیے تھے۔ تفصیلات کے مطابق اداکارہ کا کہنا تھا کہ میں نے اپنے شوہر سے جذباتی حد تک پیار کیا اور اس پیار کو بچانے کے لیے تشدد اور تضحیک بھی برداشت کی۔  متھیرا کا کہنا تھا کہ میں نے شوہر سے اس قدر پیار کیا کہ میں ماننے کو تیار ہی نہ تھی کہ وہ مجھ سے پیار نہیں کرتے۔ اداکارہ کا کہنا تھا کہ مردوں کے والدین اور خصوصی طور پر ماؤں کو سمجھنا چاہیے کہ بیٹے کی شادی کا مطلب یہ نہیں ہوتا کہ آپ نے اپنے بیٹے کو کھو دیا۔ ان کا کہنا تھا کہ پاکستان میں زیادہ تر مائیں یہ سمجھتی ہیں کہ وہ شادی کے بعد اپنے بیٹے کو کھو دیں گی لیکن ایسا نہیں ہوتا اور جب مائیں اس خوف میں مبتلا ہو جائیں تو پھر مسائل جنم لیتے ہیں۔ ان کا مزید کہنا تھا کہ میں نے شادی کے بعد سوچ لیا تھا کہ میں ہر وہ کام کروں گی جس سے میری شادی بچی رہی لیکن ایسا نہ ہو سکا اور مجھے طلاق ہو گئی۔