کراچی: سابق ٹیسٹ کرکٹر باسط علی نے کرونا وائرس کے پیش نظر اپنی یوٹیوب چینل کی آمدنی حکومت کو دینے کا اعلان کردیا۔ تفصیلات کے مطابق کرونا وائرس کے خاتمے کے لیے سابق کرکٹرز بھی میدان میں آگئے، باسط علی نے کرونا وائرس ختم ہونے تک اپنے یوٹیوب چینل کی آمدنی حکومت کو دینے کا اعلان کردیا۔باسط علی کا کہنا تھا کہ اس مشکل صورت حال میں بزنس مین آگے آئیں اور انسانیت کے لیے کردار ادا کریں۔دوسری جانب سابق کپتان شاہد آفریدی کا کہنا تھا کہ ہم پر مشکل وقت آتا ہے کہ صاحب استطاعت طبقہ مارکیٹوں سے چیزیں خرید کر اپنے گھروں میں جمع کرلیتا ہے، غریب آدمی کو سینیٹائزر اور ماسک تک نہیں مل رہا، ایسی صورتحال میں غریب لوگوں کی مدد کریں۔ ٹیسٹ کرکٹر اظہر علی نے کہا کہ ہمیں ملک کو کرونا سے محفوظ بنانے کا وعدہ کرنا ہوگا، آئیں مل کر کرونا وائرس کو شکست دیں اور احتیاطی تدابیر پر عمل کریں۔شعیب ملک کا کہنا تھا کہ کرونا وائرس کے پیش نظر شہری مصافحہ کرنے اور گلے ملنے سے گریز کریں، ہم سب نے مل کر کرونا وائرس کو شکست دینی ہے۔ واضح رہے کہ پاکستان کرکٹ بورڈ نے کراچی ہائی پرفارمنس سینٹر کو پیرا میڈیکل اسٹاف کے لیے عارضی قیام گاہ میں بدل دیا ہے۔خیال رہے کہ پاکستان میں کرونا وائرس سے6 افراد جاں بحق ہوگئے جبکہ وائرس سے متاثرہ مریضوں کی تعداد 803 ہوگئی ہے اور 6مریض صحتیاب ہو چکے ہیں۔